ویب ڈیسک
قومی ٹیم کے کپتان بابر اعظم نے تینوں فارمیٹ کی کپتانی چھوڑنے کا اعلان کردیا۔
سماجی رابطے کی ویب سائٹ ایکس (ٹوئٹر) پر قومی کرکٹر بابر اعظم نے تینوں فارمیٹ کی کپتانی چھوڑنے کا اعلان کیا اور لکھا کہ تمام فارمیٹ کی کپتانی سے دستبردار ہورہا ہوں۔
انہوں نے کہا کہ فیصلہ کرنا مشکل تھا لیکن یہی درست وقت ہے۔
بابر اعظم نے لکھا کہ پاکستان کے لیے تینوں فارمیٹ بطور کھلاڑی کھیلتا رہوں گا، پی سی بی نے جو مواقع دیے اس کا شکریہ ادا کرتا ہوں۔
انہوں نے کہا کہ اپنے تجربے کی بنیاد پر نئے کپتان کا ساتھ دوں گا۔
واضح رہے کہ اس سے قبل چیئرمین پی سی بی مینجمنٹ کمیٹی ذکا اشرف اور کپتان قومی ٹیم بابر اعظم کی ملاقات ختم ہوئی تھی۔
ذرائع کے مطابق پی سی بی نے بابر اعظم کو ٹیسٹ کی قیادت کی پیشکش کی ہے تاہم بابر نے کہا تھا کہ سوچ کر جواب دوں گا۔
واضح رہے کہ بابر اعظم کو اکتوبر 2019 میں ٹیم کی قیادت سونپی گئی تھی، وہ چار سال تک تینوں فارمیٹ کے کپتان رہے، 43 ون ڈے میچز میں قیادت کی اور 26 جیتے، 15 ہارے۔
بابر کی قیادت میں 20 ٹیسٹ میں قومی ٹیم نے 10 جیتے، 6 ہارے، 4 ڈرا ہے، ٹی 20 میں بابر پاکستان کے سب سے کامیاب کپتان رہے۔