کوئٹہ سے پشاور جانے والی جعفر ایکسپریس پر شدید فائرنگ ہوئی ہے، ایک ڈرائیور زخمی۔ ٹرین میں 450 کے قریب مسافر سوار ہیں۔
ریلوے حکام کے مطابق جعفر ایکسپریس 9 بوگیوں پر مشتمل ہے جس میں 450 کے قریب مسافر سوار ہیں۔ مسافروں اور عملے سے کوئی رابطہ نہیں ہو پا رہا ہے۔ جعفر ایکسپریس کوئٹہ سے صبح 9 بجے روانہ ہوئی تھی۔ حملہ آوروں کی فائرنگ سے ایک ڈرائیور کے زخمی ہونے کی اطلاع ہے۔
دوسری طرف ترجمان بلوچستان حکومت شاہد رند نے بھی واقعے کی تصدیق کی ہے۔ انہوں نے بتایا کہ کوئٹہ سے پشاور جانے والی جعفر ایکسپریس پر گڈالر اور پیرو کنری کے درمیان شدید فائرنگ کی اطلاعات ہیں۔ سبی ہسپتال میں ایمرجنسی نافذ کردی گئی ہے۔ ایمبولینسز جائے وقوعہ کی جانب روانہ کردی گئی ہیں، تاہم پہاڑی اور دشوار گزار علاقہ ہونے کے باعث جائے وقوعہ تک رسائی میں مشکلات پیش آ رہی ہیں۔
ترجمان کا کہنا ہے کہ محکمہ ریلوے کی جانب سے امدادی ٹرین جائے وقوعہ پر روانہ کردی گئی ہے۔ جبکہ سیکورٹی فورسز بھی مذکورہ علاقے کی جانب روانہ ہیں۔
شاہد رند کا کہنا ہے کہ واقعے کی نوعیت اور ممکنہ دہشت گردی کے پہلوؤں کا جائزہ لیا جا رہا ہے۔
’ابتدائی اطلاعات کے مطابق واقعہ دہشت گردی کا شاخسانہ ہو سکتا ہے، تحقیقات جاری ہیں۔ حکومت بلوچستان کی جانب سے ہنگامی اقدامات کی ہدایت کر دی گئی ہیں، اور تمام ادارے حرکت میں آگئے ہیں۔
ترجمان نے عوام سے پرامن رہنے اور افواہوں پر کان نہ دھرنے کی اپیل کی ہے۔